लमजुङमा चाडपर्व लक्षित विशेष सुरक्षा : ३ सय ३२ प्रहरी परिचालित

जिल्ला प्रहरी कार्यालय, लमजुङले नजिकिदै गरेको चाडपर्व (दशैँ, तिहार, छठ)लाई लक्षित गर्दै विशेष सुरक्षा योजना–२०७७ तयार गरेको छ ।  बिहीबार पत्रकार भेटघाटमार्फत जिल्ला प्रहरी कार्यालय, लमजुङले यसबारे जानकारी गराएको हो ।

‘महान पर्व दशैँ, तिहार, छठ पर्व नजिकिँदै छ । कोभिड–१९ को सङ्क्रमण पनि बढ्दो छ । चाडपर्वको बेला झनै भीडभाड बढ्न सक्छ,’ डीएसपी थापाले भन्नुभयो, ‘यसका साथै चाडपर्वको बेला हुनसक्ने चोरी, लुटपाट लगायतका अपराधिक क्रियाकलापलाई नियन्त्रण गर्नका लागि जिल्लामा विशेष सुरक्षा योजना तयारी गरी लागू गरिएको छ ।’

उहाँका अनुसार जिल्ला प्रहरी कार्यालय, लमजुङले विशेष सुरक्षा योजनाअन्तर्गत मोबाइल गस्ती, राजमार्ग सुरक्षा/अनुगमन गस्ती, मोटरसाइकल गस्ती, पैदल गस्ती, पिकेट डिउटी, चेक प्वाइन्ट, सूचना संकलन (सादा पोषाक), यात्रु सहायता कक्ष, समन्वय टिम लगायतका कार्य गर्नेछ ।

विशेष सुरक्षा योजनाअन्तर्गत जिल्लामा ३ सय ३२ प्रहरी परिचालित भएका छन् । यो सुरक्षा योजना लागू भइन्जेलसम्म जिल्लामा प्रहरीले १८ घण्टासम्म डिउटी गर्नुपर्ने अवस्था रहेको उहाँले बताउनुभयो ।

‘जिल्लामा कार्यरत सबै प्रहरी परिचालित छन् । यो योजना लागू भइन्जेलसम्म प्रहरीले १८ घण्टासम्म डिउटी गर्नुपर्ने अवस्था देखिएको छ,’ उहाँले भन्नुभयो ।